Styrkúthlutun hjá Fjarðaáli – samtals úthlutað 21 milljón

Alcoa Fjarðaál úthlutaði samfélagsstyrkjum til nærsamfélagsins að upphæð 17,7 milljónir króna í gær, þann 28. nóvember 2019. Við sama tilefni var úthlutað styrkjum frá íþróttasjóðnum Spretti að upphæð 3,5 milljónir króna en ÚÍA heldur utan um sjóðinn sem Alcoa fjármagnar. Úthlutunin fór fram í Egilsbúð í Neskaupstað og heppnaðist vel.

Alcoa Fjarðaál er stórt fyrirtæki í litlu samfélagi og því fylgir mikil ábyrgð. Einn angi af okkar samfélagsábyrgð er að styðja við verkefni í nærsamfélaginu. Við erum stolt af því að geta hjálpað góðum hugmyndum að verða að veruleika. Sumir styrkirnir frá okkur fara í að auka öryggi í landsfjórðungnum sem er vel þar sem eitt af aðalsmerkjum Alcoa er að tryggja öryggi starfsfólks, verktaka og gesta. Veittir voru átta styrkir þar sem verkefnin höfðu það markmið að auka öryggi íbúa og gesta á Austurlandi og fóru flestir þeirra til björgunarsveitanna á svæðinu. Þá voru veittir margir styrkir til menningartengdra verkefna og til að efla menntun og tómstundaiðkun barna.

Tveir styrkþegar voru fengnir til að segja stuttlega frá verkefnunum sem  styrktum. Annars vegar var það Búnaðarsamband Austurlands sem hlaut styrk að upphæð 800 þúsund krónur til að endurútgefa ritið Sveitir og jarðir í Múlaþingi sem er Austfirðingum að góðu kunnugt. Jóhann Gísli Jóhannsson frá sambandinu greindi frá því að söfnun svo verkefnið megi verða að veruleika standi enn yfir en ljóst er að þörf er á að uppfæra ritið þar sem langt er liðið frá útgáfu síðustu bókar. Hins vegar fjallaði Katrín Birna Viðarsdóttir frá Félagsmiðstöðvum Fjarðabyggðar um verkefnið Kuldabola sem er árleg hátíð þar sem ungmenni af öllu Austurlandi koma saman í Fjarðabyggðahöllinni, skemmta sér saman og fá fræðslu um mikilvæg málefni. Alcoa hefur stutt við verkefnið frá árinu 2014 og með stuðningnum er hægt að halda kostnaði sem þátttakendur greiða í lágmarki. Verkefnið hlaut að þessu sinni 500 þúsund króna styrk.

Hæstu styrkir ársins runnu annars vegar til Barnamenningarhátíðarinnar BRAS á Austurlandi, ein milljón króna, og hins vegar til Félags áhugafólks um fornleifarannsóknir á Stöðvarfirði, 1,3 milljón, en þar er unnið ötullega að því að rannsaka rústir bæjarins Stöðvar.

Dagskráin var brotin upp með lifandi tónlistarflutningi sem þau Jón Hilmar Kárason og Soffía Björgúlfsdóttir sáu um af sinni alkunnu snilld. Flutningur þeirra á laginu Vindur kom gestum í rétta aðventuskapið.

Alcoa Fjarðaál vonar að allir styrkirnir komi að góðum notum og við hlökkum til að fylgjast áfram með þessum góðu verkefnum. Viðburðurinn var sendur út beint á Facebook síðu Fjarðaáls og þar má nálgast upptöku af honum.

Hér eru nokkrar myndir frá styrkjaafhendingunni en fyrir neðan þær er tafla sem sýnir styrkþega og verkefni.

Katrín Birna frá Félagsmiðstöðvum Fjarðabyggðar tók við styrk fyrir Kuldabola.