Áfram

13. september 2011
Stóriðjuskóli Fjarðaáls settur í fyrsta sinn

Stóriðjuskóli Fjarðaáls á Hrauni við Reyðarfjörð var settur í fyrsta sinn í morgun, þriðjudaginn 13. september. Þrjátíu manns, allt starfsfólk álversins, settust þá á skólabekk í kennslustofu álsversins í því skyni að afla sér fjölbreyttrar menntunar, sem bæði er ætlað að nýtast í störfum þeirra í álverinu en einnig til frekara náms síðar. Alls sóttu yfir áttatíu manns um skólavist, en meðal umsóknaskilyrða er að lágmarki þriggja ára starfsaldur hjá Fjarðaáli.

Stóriðjuskólinn er samstarfsverkefni Verkmenntaskóla Austurlands, Þekkingarnets Austurlands og Fjarðaáls. Kennarar frá öllum aðstandendum skólans koma að kennslunni en námið byggist m.a. á námsskrá um stóriðjunám sem Fræðslumiðstöð atvinnulífsins hefur gefið út.
 
Í Stóriðjuskólanum er boðið upp á grunnnám sem tekur þrjár annir og framhaldsnám sem nær yfir fjórar annir. Að því loknu geta nemendur fengið námið metið inn í framhaldsskólakerfið, þar sem það nýtist til stúdentsprófs eða iðnnáms. Grunnámið er ætlað framleiðslustarfsfólki og iðnaðarmönnum álversins. Þeir sem ljúka grunnnáminu geta hafið framhaldsnámi í stóriðjufræðum. Ekki er gerð krafa um ákveðna grunnmentun en ætlunin er að mæta aðstæðum í samræmi við skólagöngu hvers og eins.

Að sögn Sigurðar Ólafssonar, fræðslustjóra hjá Fjarðaáli, kom nefnd á vegum Afls starfsgreinafélags og Rafiðnaðarsambands Íslands að undirbúningi námsins og var mikil eining milli aðila um fyrirkomulag þess.
 
Námsvistin hefur talsverða launahækkun í för með sér hjá Fjarðaáli.
  
 
 



Smelltu á myndina til þess að stækka hana.


Fyrsti skóladagurinn


Nemendur samankomnir á fyrsta skóladegi Stóriðjuskóla Fjarðaáls, sem settur var í morgun.



Smelltu á myndina til þess að stækka hana.


Samhent hjón


Hrönn Bergþórsdóttir og eiginmaður hennar, Björgvin Guðmundsson, sem bæði vinna hjá Fjarðaáli, komust inn í Stóriðjuskólann og þeim virðist líka námið vel.