Prentvæn útgáfa
 go
|
|
11. september 2007
Alcoa tekur þátt í íslenska djúpborunarverkefninu
Alcoa greindi frá því í dag að fyrirtækið muni styrkja íslenskar rannsóknir á djúpborunum til raforkuframleiðslu. Fyrirtækið telur að djúpboranir gætu orðið stórt skref í þá átt að nota jarðvarmaorku um allan heim.
Samstarfsaðilar Alcoa um djúpboranir á Íslandi munu kanna hagkvæmni þess að vinna orku og efnasambönd úr háhitasvæðum með því að bora mun lengra niður í jörðina en áður hefur verið gert. Þar er að finna miklu meiri hita og þrýsting en í efri jarðlögum. Talið er að slíkar borholur gætu framleitt allt að tíu sinni meiri raforku en þær borholur sem notaðar eru í dag.
Tómas Sigurðsson, forstjóri Alcoa Fjarðaáls í Reyðarfirði sagði: "Þetta er mjög spennadi verkefni og það er verulega ánægjulegt að taka þátt í að gera það að veruleika. Það er augljóst að við höfum mikinn áhuga á verkefninu þar sem við erum m.a. að skoða hagkvæmni þess að reisa álver á Norðurlandi. En verkefnið getur jafnframt orðið mikil lyftistöng fyrir Ísland á alþjóðavettvangi og vakið athygli á sérþekkingu okkar og reynslu við nýtingu jarðvarma".
Bernt Reitan, aðstoðarforstjóri Alcoa Inc. sagði við undirritun samningins: “Við lítum þannig á að við séum að bora fyrir framtíðina. Heimsbyggðin þarf nauðsynlega að auka nýtingu jarðhita til að draga úr útstreymi gróðurhúsalofttegunda. Fyrir Alcoa er þetta mjög spennandi verkefni því ef niðurstaðan verður jákvæð opnast möguleikar á að tvinna saman vistvæna raforkuframleiðslu og sérþekkingu okkar á álframleiðslu. Jákvæð áhrif notkunar áls í samgöngutækjum á útstreymi gróðurhúsalofttegunda, myndu skipta verulega máli varðandi umhverfismál í alþjóðlegu samhengi. Ef þetta gengur vel ætti að verða hægt að nota djúpborun um allan heim þar sem jarðhita er að finna.”
Samstarfsaðilar um djúpboranir á Íslandi eru auk Alcoa: Landsvirkjun, Orkuveita Reykjavíkur, Hitaveita Suðurnesja hf. og Orkustofnun.
Við djúpborun er gert ráð fyrir að bora niður á 4-5 km dýpi þar sem hitastigið er um 400-600°C. Flestar jarðhitaholur í dag eru um 2 km á dýpt og blása gufu sem er um 300°C. Venjulegar borholur standa í dag undir framleiðslu á um 5 megavöttum af raforku. Ef tekst að bora eftir 450°C heitri gufu og sé miðað við að upp komi 0,67 rúmmetrar af gufu á sekúndu, gæti slík hola staðið undir framleiðslu á 40-50 megavöttum af rafmagni.
Orkufyrirtækin þrjú fjármögnuðu forkönnun fyrir verkefnið sem lauk árið 2003. Þau munu hvert um sig bora eina 3,5 – 4 km djúpa holu á sínum svæðum. Gert verður ráð fyrir að mögulegt verði að dýpka þær holur niður á 4,5 – 5 km dýpi. Ein holan verður síðan valin til dýpkunar í samstarfi fyrrgreindra aðila. ICDP (International Continental Scientific Drillin Program); alþjóðlegur sjóður sem styrkir vísindaboranir um allan heim og Bandaríski vísindasjóðurinn NSF (National Science Foundation) munu einnig veita rannsóknastyrki til verkefnisins.
Gert er ráð fyrir að fyrsta holan verði boruð við Kröflu á næsta ári og að hún verði prófuð árið 2009. Tvær nýjar 4 km djúpar holur munu verða boraðar í Hengli og á Reykjanesi árin 2009-2010 og síðan dýpkaðar. Áætlanir gera ráð fyrir að tilraunaorkuvinnslu ljúki árið 2015 eða þar um bil.
|
|
|
