Ríflega 30 starfsmenn Alcoa Fjarðaáls, makar og börn tóku þátt í sjálfboðavinnu á laugardag. M.a. var reist 26 metra löng girðing á lóð leikskólans Dalborgar á Eskifirði auk þess sem unnið varð við strandhreinsun í friðlandinu frá Eskifjarðarbrú yfir Hólmahálsinn. Fleiri verkefni verða innt af hendi næstkomandi laugardag.
Góð stemning ríkti á meðal sjálfboðaliðanna og naut fólk náttúrunnar í blíðunni þótt kalt væri. Girðingarvinnan gekk fljótt og vel fyrir sig og pizzurnar sem boðið var upp á í kjölfarið runnu ljúflega niður í svanga maga.
Um fimmtíu manns sóttu síðan fund sem Alcoa Fjarðaál efndi til fyrir félagasamtök á Mið-Austurlandi til þess að kynna stefnu sína í styrkveitingum og samfélagsvinnu. Á fundinum voru m.a. kynntir til sögunnar svokallaðir Action og Bravo-styrkir sem Alcoa stendur að. Fundurinn var að sögn Ernu bráðskemmtilegur og fróðlegur. „Margar góðar hugmyndir kviknuðu á fundinum,” sagði Erna og var ánægð með afrakstur hans.
Þessi verkefni Alcoa Fjarðaáls eru hluti af samfélagsátaki Alcoa Corp. í október um heim allan. Talið er að um 25.000 manns á 200 starfsstöðvum fyrirtækisins um víða veröld leggi átakinu lið í margvíslegum verkefnum. Markmiðið með þessu skipulagða átaki er að kynna sjálfboðastörf sem hluta af þeim gildum sem Alcoa stendur fyrir og efla skilning starfsmanna á mikilvægi þeirra.
