Endurvinnsla, flokkun og förgun úrgangs
Endurvinnsla er í hávegum höfð hjá Alcoa Fjarðaáli og litið er á sorp sem
auðlindir á villigötum. Skýrt dæmi um það er öflugur þurrhreinsibúnaður sem
hreinsar meira en 99,5% flúorefna úr útblæstri álversins, sem síðan er
endurnýttur við álframleiðsluna.
Leifar rafskauta sem gengt hafa hlutverki sínu við rafgreiningu áls eru send
til Noregs þar sem þau eru endurnýtt við framleiðslu nýrra skauta.
Kerbrot, álgjall og ýmsar aðrar aukaafurðir sem falla til við framleiðsluna
eru sendar til Bretlands til endurvinnslu. Þar eru kerbrotin notuð við
framleiðslu á sementi. Ekkert frárennsli er frá framleiðsluferlum álversins í
sjó og stefnt er að því að enginn úrgangur fari til urðunar. Allt sorp sem
fellur til er flokkað og lífrænn úrgangur er notaður í moltugerð, svo dæmi séu
tekin.
Átak í endurvinnslu áldósa
Endurvinnsla hefur áratugum
saman verið eitt þeirra umhverfismála sem Alcoa leggur áherslu á. Nú hefur
fyrirtækið ýtt úr vör átaki sem ætlað er að auka endurvinnsluhlutfall áldósa í
Bandaríkjunum úr 52% í 75% fyrir árið 2015. Ef takmarkið næst þýðir það að um
600.000 tonn af áldósum sem nú fara í landfyllingar á ári hverju munu skila sér
til endurvinnslu.
Í þessu skyni reynir fyrirtækið að auka meðvitund neytenda um kosti þess að
endurvinna ál og um leið eru skil á dósum gerð auðveldari. Leitað er eftir
samvinnu við önnur álfyrirtæki til að vinna málinu brautargengi.
Ástæðan er einföld. Áldósir er hægt að endurvinna algerlega. Úr hverri dós
sem skilað er verður til önnur dós. Ekkert fer til spillis. Við endurvinnslu áls
sparast mikil orka. Aðeins þarf 5% þeirrar orku sem notuð er við framleiðslu áls
til að endurvinna það.
