Besta fáanlega tækni
Mikla orku þarf til að framleiða ál og við framleiðsluna losnar óhjákvæmilega
koltvísýringur og aðrar gróðurhúsalofttegundir. Alcoa hefur unnið að því að
minnka útblástur koltvísýrings frá framleiðslunni og liður í því er að
nýta umhverfisvæna orkugjafa til álframleiðslu. Uppbygging á Íslandi fellur vel
að þeirri stefnu enda losa álver og vatnsaflsorkuver sex til níu sinnum minna af
gróðurhúsalofttegundum en álver og orkuver sem brennir jarðefnaeldsneyti.
Alcoa hefur sett sér metnaðarfull markmið í loftslagsmálum fram til ársins
2020 og meðal annars tekist að minnka losun gróðurhúsalofttegunda við
álframleiðslu um yfir 30% frá árinu 1990, þrátt fyrir að framleiðslan hafi
aukist umtalsvert á sama tíma. Áhersla er lögð á að auka endurvinnslu áls en til
hennar þarf aðeins um 5% þeirrar orku sem þarf til framleiðslu áls úr
súráli.
Alcoa vinnur einnig að rannsóknum á endurbættum aðferðum við rafgreiningu,
notkun sólarorku, endurnotkun hitaorku sem myndast í framleiðsluferlum, og
fjölmörgum öðrum kostum sem gætu leitt til umtalsverðs orkusparnaðar. Meðal
verkefna sem unnið er að í tengslum við Fjarðaál sérstaklega má nefna að
fyrirtækið hefur styrkt rannsóknir á upptöku koltvísýrings í íslenskum
skógi.
Alcoa var meðal tólf stofnenda United States Climate Action
Partnership; bandarískra samtaka fyrirtækja og sjálfstæðra stofnana sem hafa það
að markmiði að þrýsta á stjórnvöld í Bandaríkjunum að herða reglur um losun
gróðurhúsalofttegunda. Núna telja þessi samtök 31 fyrirtæki og stofnanir.
Fyrir þessa viðleitni og fjölmörg verkefni í loftslagsmálum sem Alcoa hefur
lagt lið hefur fyrirtækið hlotið ýmsar viðurkenningar. Til dæmis var Alcoa í
janúar 2008 í fjórða sinn valið eitt af 100 sjálfbærustu fyrirtækjum heims á
heimsviðskiptaráðstefnunni í Davos í Sviss. Alcoa er einnig á sjálfbærnilista
útgáfufyrirtækisins Dow Jones sem byggir á greiningu á frammistöðu og framgöngu
fyrirtækja í efnahagsmálum, umhverfismálum og félagsmálum.
Alcoa Fjarðaál og loftslagsmálin
- Náið er fylgst með útblæstri gróðurhúsalofttegunda hjá Fjarðaáli og
nýjasta tækni er notuð til að halda henni í lágmarki.
- Útblástur gróðurhúsalofttegunda á hvert tonn af framleiddu áli hjá
Fjarðaáli verður með því minnsta sem gerist í heiminum.
- Rafmagnsbílar og lyftarar eru notaðir í álverinu og lífdíselolía er notuð
á önnur farartæki. Þessi olía kemur í stað díselolíu og er unnin úr dýrafitu,
matarolíu og lýsi.
- Fjarðaál hefur styrkt loftslagsverkefni Landverndar.
- Fjarðaál styrkir rannsóknir á vegum Skógræktar ríkisins á upptöku kolefna
í trjágróðri.
- Starfsfólk Fjarðaáls vinnur sjálfboðavinnu við trjáplöntun og
Skógræktarfélag Reyðarfjarðar er styrkt árlega.
Tengdar vefsíður
Stefna Alcoa í loftslagsmálum
skoða
