Áfram


Prentvæn útgáfa
go

1. október 2013
Alcoa fagnar 125 ára starfsafmæli sínu

Hundrað tuttugu og fimm ár eru í dag liðin frá því að fyrsta álver Alcoa tók til starfa í Pittsburgh í Bandaríkjunum. Af því tilefni fagnar fyrirtækið tímamótunum á starfsstöðvum sínum um allan heim.  Áhersla er lögð á samfélagsmál, sem fyrirtækinu er mikið í mun að sinna vel. Tilkynnt hefur verið um 1,25 milljón dollara samfélagsverkefni þar sem 500 nemendum verður boðið starfsnám í 8 löndum á næstu tveimur árum. Markmiðið er að gefa atvinnulausum ungmennum tækifæri til að öðlast reynslu í framleiðslu sem gæti leitt til starfsferils á því sviði.

Í afmælisveislu hjá Fjarðaáli í dag var greint frá tveimur stórum verkefnum sem Samfélagsjóður Alcoa (Alcoa Foundation) hefur styrkt með umtalsverðum hætti. Er annars vegar um að ræða verkefni til eflingar almenningssamgangna á Austurlandi og hins vegar framkvæmdir við Jökulsá á Dal til að auka laxagöngu í ánni.
 
Samfélagssjóður Alcoa hefur styrkt Veiðifélag Jökulsár á Dal um 84 þúsund dollara, rúmar 10 milljónir króna, til uppbyggingar árinnar sem laxveiðiár. Er unnið að fjölgun laxa í ánni og kaupendum laxveiðileyfa, en markmiðið er ekki síður að stuðla að vernd Norður-Atlantshafslaxastofnsins, fjölgun ferðamanna og nýrra starfa á svæðinu. Byggður hefur verið laxastigi gegnum steinboga í ánni og er fyrirhugað að leggja göngustíga og göngubrýr á svæðinu og koma fyrir fiskiteljara. Árangur af gerð laxastigans hefur ekki látið á sér standa. Laxar ganga nú upp Jökuldalinn í töluverðu magni og veiddust 380 laxar í sumar, þar af um 50% ofan stigans. Sleppiskylda er enn í ánni, en stefnt er að því að gera Jöklu sjálfbæra sem laxveiðiá á næstu 10-15 árum.
 
Austurbrú hefur umsjón með  framkvæmd samgönguverkefnisins á Austurlandi. Unnið er að því að bæta miðasölukerfi, setja upp strætóskýli og efla upplýsingagjöf og er markmiðið að fjölga strætófarþegum umtalsvert og draga um leið úr notkun einkabíla í landsfjórðungnum. Öll sveitarfélög á Austurlandi standa sameiginlega að verkefninu, sem Samfélagssjóður Alcoa hefur lagt lið með 66 þúsund dollara framlagi, sem samsvarar um 8 milljónum króna.
 
Í afmælisveislunni hjá Fjarðaáli var ennfremur greint frá tveimur sjálfboðaliðaverkefnum á vegum starfsmanna fyrirtækisins, sem unnin voru í lok september. Á Neskaupstað var hjólastólaaðgengi bætt við þjónustuíbúðir fatlaðara við Bakkabakka og á Reyðarfirði var unnið að viðhaldsverkefnum í húsnæði félagsmiðstöðvar grunnskólans.
  
 
Til upplýsingar
Árið 1888 var fyrsta álverið reist í Pittsburgh í Bandaríkjunum eftir að systkinin Charles Martin Hall og Julia Hall fundu upp rafgreiningaraðferð við álframleiðslu. Á sama tíma fann Frakkinn Paul Heroult upp svipaða aðferð. Hún er kölluð Hall-Heroult aðferðin og er enn þann dag í dag notuð til álframleiðslu. Álverið í Pittsburgh var undanfari Alcoa samsteypunnar sem nú á og rekur 22 álver í fimm heimsálfum. Afmælinu er því fagnað víða um heim. Í Fjarðaáli var starfsmönnum boðið upp á veislumat og afmælisköku og afmælissöngurinn var að sjálfsögðu sunginn!




Smelltu á myndina til þess að stækka hana.


Einn vænn úr Jöklu


Jón Traustason með 17 punda hæng úr Jöklu.



Smelltu á myndina til þess að stækka hana.


Falleg laxveiðiá


Jökla er orðin lygn og falleg laxveiðiá



Smelltu á myndina til þess að stækka hana.


Afmælisveisla


Úr afmælisveislunni. Um 500 manns, starfsfólk Alcoa og undirverktaka snæddu veislumat í tilefni dagsins.



Smelltu á myndina til þess að stækka hana.


Styrkur til mennta


Ásta tekur á móti styrknum til Austurbrúar frá Magnúsi Þór Ásmundssyni, forstjóra Alcoa á Íslandi.



Smelltu á myndina til þess að stækka hana.


Frábær skemmtun!


Ari Eldjárn fór á kostum og vakti mikla lukku að vanda.