Áfram

23. janúar 2013
Nýtt fæðingarrúm á Fjórðungssjúkrahúsinu á Neskaupstað

Nýtt fæðingarrúm hefur verið tekið í notkun á Fjórðungssjúkrahúsinu á Neskaupstað í stað eldra rúms sem komið var til ára sinna og úr sér gengið. Nokkrir velunnarar sjúkrahússins lögðu til fé til kaupa á nýju rúmi af bestu gerð, þar á meðal Alcoa Fjarðaál og Samvinnufélag útgerðarmanna í Neskaupstað. Það var svo íþróttakonan Harpa Vilbergsdóttirr sem sl. sumar safnaði áheitum til styrktar fæðingardeildinni með þátttöku í Reykjavíkurmaraþoninu, sem gerði sjúkrahúsinu endanlega kleift að ráðast í kaupin á rúminu.

Jónína Salný Guðmundsdóttir, ljósmóðir á Fjórðungssjúkrahúsinu, segir að mikil ánægja sé með nýja rúmið enda hafi það gamla m.a. verið orðið bremsulaust og stirt í notkun. „Það var farið að fara talsverð orka í það í fæðingum að hemja rúmið og við vorum löngu hætt að fá í það varahluti,“ segir Salný, sem tekur fram að nýja rúmið sé með góðum bremsum, lipurt og þægilegt í notkun og að sjálfsögðu með rafmagni og öllum helstu þægindum.
 
Á Fjórðungssjúkrahúsinu á Neskaupstað fæddu 78 konur barn á nýliðnu ári, 38 drengi og 40 stúlkur. Konurnar komu víða að á Austurlandi til að fæða á Neskaupstað, m.a. frá Fjarðabyggð, Fljótsdalshéraði, Seyðisfirði, Borgarfirði og Djúpavogi. Salný segir að árið 2013 stefni í að verða þokkalega líflegt því nú þegar séu þrjú börn fædd á deildinni.



Smelltu á myndina til þess að stækka hana.


GJöf sem kemur sér vel


Starfsfólk spítalans, móðir og nýfætt barn, fagna nýja rúminu ásamt Janne Sigurðsson, forstjóra Alcoa Fjarðaáls.