Áfram

28. nóvember 2012
Forstjóri Fjarðaáls meðal fremstu kvenstjórnenda ársins

Janne Sigurðsson, forstjóri Alcoa Fjarðaáls, hlaut nýlega Stevie-gullverðlaunin sem forstjóri ársins í hópi kvenna í atvinnurekstri í Evrópu, Mið-Austurlöndum og Afríku. Verðlaunaafhendingin fór fram í New York fyrr í mánuðinum.

Janne hlaut verðlaunin fyrir þátttöku í uppbyggingu, eflingu og rekstri álvers Alcoa við Reyðarfjörð á þeim sex árum sem liðin eru frá því að hún gekk til liðs við Alcoa. Á þessum tíma hefur hún stjórnað mikilvægum umbótaverkefnum, lagt sig fram um að skapa öruggt vinnuumhverfi í álverinu og náð miklum árangri í að auka starfsánægju í fyrirtækinu. Hún hefur einnig tekið virkan þátt í að byggja upp samfélagið á Austurlandi.
 
„Ég er mjög glöð yfir því að hafa fengið þetta tækifæri, að hafa verið með frá upphafi í byggingu og gangsetningu álversins og koma fyrirtækinu í þá stöðu sem það er í núna. Íbúar á svæðinu og sveitarstjórnir hafa stutt vel við bakið á okkur og staðið með Fjarðaáli frá upphafi,“ segir Janne. „Mér er mikill heiður að því að hljóta gullverðlaun Stevie® sem stjórnandi ársins í hópi kvenna í Evrópu, Mið-Austurlöndum og Afríku.“
 
Stevie verðlaunin eru alþjóðleg verðlaun sem veitt eru árlega þeim sem skara fram úr í stjórnun stofnana og fyrirtækja um allan heim. Rúmlega 200 stjórnendur sátu í dómnefndinni sem valdi Stevie gull-, silfur- og bronsverðlaunahafa ársins í ýmsum flokkum. Almennt eru þeir sem hljóta viðurkenninguna kallaðir „the Stevies” sem dregið er af gríska orðinu fyrir krýnda, eða þá sem bera kórónu. „Þær konur sem hlutu Stevie-viðurkenningarnar í ár eru einstakar afrekskonur. Þetta er tilkomumesti hópur sem við höfum séð frá upphafi. Velgengni þeirra er hvatning fyrir aðrar konur um allan heim sem vilja koma á stofn og reka fyrirtæki, og láta til sín taka í atvinnulífinu,“ sagði Michael Gallagher, formaður og stofnandi Stevie Awards.
 
Um Janne Sigurðsson
Janne Sigurðsson er dönsk að uppruna, fædd í Álaborg í Danmörku árið 1966. Hún útskrifaðist 1995 sem cand scient í stærðfræði og tölvunarfræði frá Háskólanum í Álaborg. Hún hefur síðan þá aflað sér víðtækrar reynslu af stjórnunarstörfum hjá ýmsum fyrirtækjum í Danmörku og hjá Fjarðaáli við Reyðarfjörð, þangað sem hún réðst til starfa í maí árið 2006. Janne hóf starfsferilinn hjá álverinu sem framkvæmdastjóri upplýsingatækni. Fáum mánuðum síðar varð hún framkvæmdastjóri framleiðsluþróunar og framkvæmdastjóri kerskála var hún á árunum 2008 til 2010. Hún varð framkvæmdastjóri framleiðslu í apríl 2010, en þann 1. janúar 2012 var hún ráðin forstjóri fyrirtækisins í stað Tómasar Más Sigurðssonar sem tók við starfi forstjóra Alcoa í Evrópu með aðsetri í Genf.
 
Um Alcoa
Alcoa er stærsti framleiðandi heims á sviði hrááls og unninna álvara, og jafnframt stærsta báxítnámu- og súrálsframleiðslufyrirtæki í heimi. Auk þess að finna ásamt frakkanum Heroult, upp aðferðina sem nú er mest notuð við framleiðslu áls, hefur Alcoa verið frumkvöðull á ýmsum sviðum atvinnugreina með virkri þátttöku í þróun í flugiðnaði, bílaiðnaði, umbúðalausnum, byggingariðnaði, almenningssamgöngum, rafeindaiðnaði og öðrum iðnaði síðastliðin 120 ár.



Smelltu á myndina til þess að stækka hana.


Janne Sigurðsson, forstjóri Alcoa Fjarðaáls


Janne í steypuskála Alcoa Fjarðaáls - með öryggið í fyrirrúmi.



Smelltu á myndina til þess að stækka hana.


Unnið fyrir samfélagið


Eitt af því sem valnefndin tók sérstaklega eftir, er sjálfboðaliðavinna Janne og starfsmanna fyrirtækisins. Hér sést Janne í sjálfboðaverkefni á Eskifirði.