 |
|
|
|
|
Prentvæn útgáfa
 go
|
|
27. ágúst 2012
Á þriðja þúsund í afmæli Fjarðaáls
Fjölmenni var í afmælisveislu Alcoa Fjarðaáls, sem hélt upp á 5 ára starfsafmæli sitt í blíðskaparveðri sunnudaginn 26. ágúst. Vel á þriðja þúsund manns heimsóttu álverið enda fjölbreytt dagskrá í boði fyrir unga sem aldna.
Boðið var upp á reglulegar skoðunarferðir um álverið, sem margir gestir nýttu sér. Lúðrasveit Norðfjarðar flutti nokkur lög og Bergþór Pálsson söng með karlakórnum Glað frá Eskifirði. Á útisviði lék rokkhljómsveit álversins, Álbandið, og Slökkvilið Fjarðabyggðar sýndi tækjaflotann á meðan yngsta kynslóðin lék sér í hoppkastala og gæddi sér á ís og sykurfrauði. Grínistar og töframenn voru á staðnum og frá Þjóðleikhúsinu komu Lilli klifurmús og Mikki refur, sem gerðu stormandi lukku. Einnig flutti hljómsveitin Coney Island Babies lög af nýjum geisladiski sínum.
Í matsal álversins var hvert sæti skipað en þar var boðið upp á veitingar. Þar lék hin gamalgróna hljómsveit HildirHans ljúfa tóna auk þess sem sýndir voru listmunir úr áli eftir íslenska hönnuði.
Í ávarpi sem Janne Sigurðsson, forstjóri Fjarðaáls, flutti í upphafi afmælisveislunnar, sagði Janne að hún væri stolt yfir því tækifæri að fá að taka virkan þátt í „fæðingu og uppvexti“ álversins sl. fimm ár og koma fyrirtækinu á þann stað, þar sem það er nú.
„Fimm ára afmælisbarn á fjölda frænka og frænda og líka afa og ömmur. Það gildir líka um Fjarðaál. Það á stóra fjölskyldu á Austurlandi sem öll hefur staðið við bakið á fyrirtækinu og hjálpað til við uppvöxtinn. Það hafa allir hjálpast að við að koma Fjarðaáli á legg og skapa þær aðstæður að það geti haldið áfram að vaxa og dafna um ókomna tíð.“
Um kvöldið voru haldnir tónleikar í Tónlistarmiðstöð Austurlands í tilefni af 120 ára fæðingarafmæli Inga T. Lárussonar. Tónleikarnir voru í boði Fjarðaáls og var fullt út úr dyrum. Lauk þar með formlega afmælishátíð Alcoa Fjarðaáls.
|
|
|
|
|
