Áfram

5. mars 2012
Nýr spennir tekinn í notkun hjá Fjarðaáli

Afriðillinn sem skemmdist í bruna hjá Fjarðaáli í desember 2010 hefur verið endurnýjaður og tekinn í notkun á ný. Skipta þurfti um spenni í honum en unnt var að gera við aðra hluta hans. Nú hefur straumur til kera álversins verið aukinn á ný og er verksmiðjan smátt og smátt að ná upp sínum fyrri afköstum, en draga þurfti úr straumi til keranna í kjölfar brunans.

Öflug sprenging varð í einum af fimm afriðlum Fjarðaáls vegna útleiðslu skömmu fyrir jól 2010. Með snarræði tókst að koma í veg fyrir að eldurinn breiddist út og að aðrir afriðlar, sem störfuðu eðlilega, ofhitnuðu þrátt fyrir eldhafið í kring. Tókst því að halda starfsemi álversins gangandi þrátt fyrir sprenginguna.
 
Þegar eftir brunann var hafist handa við undirbúning þess að fá nýjan afriðil en afriðlar Fjarðaáls samanstanda af afriðlaspenni, reglunarspenni og ýmsum áföstum fylgibúnaði og vegur hver samstæða í heild nálægt 500 tonnum. Var gert við sumar einingar hans á verkstæðum á Reyðarfirði, afriðlaspennirinn var sendur til Noregs til viðgerðar. Nýr reglunarspennir var smíðaður hjá Fuji í Japan á innan við átta mánuðum, sem er óvenjuskammur tími fyrir svo stóran spenni sem hér um ræðir. Hjá Fuji þakka menn þetta góðri samvinnu og mikilli vinnu í verksmiðjunni.
 
Hér á landi hafa nærri eitt hundrað manns komið að þessu stóra verkefni.  Fjöldi Alcoa starfsmanna vann að því en HRV var aðalverktaki og sá um undirbúning, hönnun og framkvæmd verksins. HRV átti samstarf við verkfræðistofuna HATCH og ýmis fleiri verktakafyrirtæki í verkefninu, en það var verkfræðistofan EFLA sem sá um eftirlit með framkvæmdinni.



Smelltu á myndina til þess að stækka hana.


Skipað upp


Nýr reglunarspennir (262 t) frá Japan hífður á land. Reglunarspennirinn var smíðaður frá grunni hjá Fuji í Japan.



Smelltu á myndina til þess að stækka hana.


Komið fyrir


Afriðlaspennirinn sem gerður var upp í Noregi, settur á sinn stað. Kraninn á myndinni var pantaður sérstaklega frá Danmörku til að sjá um verkið og koma honum fyrir á sínum stað. Hann er um eitt þúsund tonn að þyngd og hefur um 750 tonna lyftigetu.



Smelltu á myndina til þess að stækka hana.


Afriðill


Afriðillinn kominn á sinn stað og byrjaður að sinna sínu hlutverki.