Áfram

5. desember 2011
Framkvæmdum miðar vel áfram við nýja kersmiðju - 100 þúsund slysalausum vinnustundum nýlega fagnað

Framkvæmdum miðar vel áfram við byggingu nýrrar kersmiðju Alcoa Fjarðaáls á Reyðarfirði og fögnuðu starfsmenn byggingaverktakanna nýlega 100 þúsund slysalausum vinnustundum við framkvæmdirnar. Tæplega hundrað manns vinna við bygginguna. Kostnaður vegna framkvæmdanna er áætlaður nálægt fjórum milljörðum króna.

Starfsemi kersmiðjunnar á að hefjast í apríl á næsta ári eftir rúmlega 17 mánaða framkvæmdatíma, en fyrsta skóflustungan var tekin í byrjun nóvember á síðasta ári. Í kringum 60 manns munu vinna í kersmiðjunni.
 
Alls eru 336 ker í álveri Fjarðaáls, þar sem framleidd eru tæplega 3 tonn af áli á sólarhring. Áætlað er að endurfóðra 45 ker árið 2012 og 110 ker árin 2013 og 2014. Flatarmál kersmiðjunnar er rúmlega 4000 fermetrar en hún skiptist í þrjá hluta, kerfóðrunarbyggingu, kerbrotabyggingu og skrifstofubyggingu. Hægt verður að endurfóðra þrjú ker í einu og mestu afköst verða tvö og hálft ker á viku.
 
Vélaverkstæði Hjalta Einarssonar hefur tekið að sér að fóðra kerin en starfsmenn Fjarðaáls munu sjá um gæðaeftirlit með vinnu og hráefnum, innkaup á hráefnum og samhæfingu við aðra starfsemi Fjarðaáls.



Smelltu á myndina til þess að stækka hana.


Kersmiðjan rís


Kersmiðjan er óðum að taka á sig endanlega mynd. Fremst er kerbrotabyggingin og hægra megin við hana er kerfóðrunarbyggingin. Starfsemi hefst í apríl.