 |
|
|
|
|
Prentvæn útgáfa
 go
|
|
26. október 2011
Vélaverkstæði Alcoa Fjarðaáls fyrirtæki ársins að mati Vinnueftirlitsins
Miðgarður, vélaverkstæði Alcoa Fjarðaáls, fékk í gær, þriðjudag, viðurkenningu Vinnueftirlitsins sem fyrirtæki ársins. Vinnueftirlitið veitir því fyrirtæki viðurkenningu, sem þykir skara framúr á því sviði sem er í kastljósinu ár hvert.
Miðgarður fékk viðurkenninguna fyrir afburða vel skipulagt og snyrtilegt verkstæði. Þar þykir vinnuverndin höfð í hávegum og þar er allur búnaður varðandi öryggismál til staðar. Áhættumat fyrir verkstæðið hefur verið gert og þar er alltaf unnið sérstakt áhættumat áður en farið er í stærri viðhaldsverkefni. Að mati Vinnueftirlitsins þykir vélaverkstæðið standa sig sérstaklega vel varðandi alla þætti sem tengjast viðhaldsvinnu.
Evrópska vinnuverndarvikan 2011 er nú haldin dagana 24. - 28. október. Í ár er þemað Öruggt viðhald - Allra hagur, og stóð Vinnueftilitið fyrir ráðstefnu um þálaflokkinn 25. október. Á ráðstefnunni voru flutt erindi og efni sem fjalla um öryggi við viðhaldsvinnu auk þess sem veittar voru viðurkenningar til fyrirtækja sem talin eru standa sig vel á því sviði sem tengist viðhaldsvinnu.
Á vef Vinnueftirlitsins er nánar fjallað um mikilvægi vel skipulagðs viðhalds. Þar segir m.a.: „Viðhald og viðgerðir sem framkvæmdar eru eftir að búnaður bilar eru í eðli sínu hættuleg vinna. Þegar bilanir verða kemur upp óvanalegt ástand sem víkur frá venjunni og því sem starfsmenn t.d. í framleiðslufyrirtækjum eru að fást við á hverjum degi. Bilanirnar þýða líka tafir og kostnað og mikill þrýstingur getur verið á að koma hlutunum í lag aftur til að lágmarka tíma- og fjármunatapið. Þarna koma því saman tveir þættir sem geta orsakað slys; óvanalegar aðstæður sem menn jafnvel þekkja ekki að fullu og reyna jafnframt að ráða við á sem allra stystum tíma. Eðli bilana er því þannig að mikil hætta er á slysum í tengslum við þær. Enda sýna tölur að 10-15% af banaslysum við vinnu og 15-20% af öllum vinnuslysum í Evrópu tengjast viðhaldi og viðgerðum.“
Lestu meira um mikilvægi vel skipulagðs viðhalds hér.
|
|
|
|
|
