 |
|
|
|
|
Prentvæn útgáfa
 go
|
|
10. október 2011
Starfsmenn Fjarðaáls í bleiku boðhlaupi - til styrktar krabbameinsfélögum á Austurlandi
Bleiki mánuðurinn var settur með trukki hjá Fjarðaáli í gær, sunnudaginn 9. október. Þá tóku um 60 manns, starfsfólk álversins ásamt mökum, börnum og öðrum fylgifiskum þátt í bleiku boðhlaupi inn Reyðarfjörðinn til styrktar krabbameinsfélögum á Austurlandi. Með þátttöku sinni söfnuðu starfsmenn álversins 350.000 króna framlagi frá Samfélagssjóði Alcoa, sem renna mun óskipt til krabbameinsfélaganna.
Ræst var frá tveimur stöðum í einu kl. 10:00 um morguninn, annars vegar frá Vattarnesi sunnan mynnis Reyðarfjarðar og hins vegar frá Litlu-Breiðuvík norðan mynnis og var hlaupið til Reyðarfjarðar, alls um 65 km vegalengd. Þátttakendur fengu að sjálfsögðu bleikan bol til að hlaupa í. Að loknu hlaupi var haldin pizzuveisla í Sómasetrinu, húsi starfsmannafélags Fjarðaáls.
Einn af yngstu þátttakendum hlaupsins var Embla Ingólfsdóttir, sem er aðeins þriggja ára gömul. Hún beitti móður sinni fyrir vagninn sinn en snaraðist frá borði skömmu áður en komið var að endamarki og hljóp síðustu 100 metrana. Maður en nú bara þriggja ára!
Elsti þátttakandinn var hins vegar Valsteinn Þórir Björnsson sem fagnaði m.a. sjötugsafmæli sínu í sumar. Valsteinn er ekki óvanur hreyfingu því hann fer daglega í sund auk þess sem hann gengur mikið, hjólar talsvert og fer reglulega í ræktina sér til enn frekari heilsubótar.
Um Samfélagssjóð Alcoa
Samfélagssjóður Alcoa hefur undanfarin ár veitt um þremur milljónum króna á ári til þess að styðja við svokölluð „ACTION“ verkefni á Austurlandi. Þau felast í því að starfsmaður Fjarðaáls fær hugmynd að sjálfboðaverkefni í þágu félagasamtaka eða stofnunar, og mætir þá hópur starfsmanna á ákveðnum degi og vinnur í a.m.k. 4 tíma fyrir samtökin. Upphæðin sem rennur til samtakanna veltur á því hversu margir starfsmenn taka þátt, en yfirleitt mæta einnig fjölskyldur þeirra og aðrir áhugasamir um verkefnin hverju sinni.
|
|
|
|
|
