 |
|
|
|
|
Prentvæn útgáfa
 go
|
|
8. desember 2010
Losun og endurvinnsla
Magn útblástursefna frá álverinu í Reyðafirði það sem af er árinu, er undir þeim mörkum sem starfsleyfi fyrirtækisins setur. Allur framleiðsluúrgangur frá álverinu fer til útlanda til endurvinnslu. Þetta kom fram á íbúafundi sem haldinn var í álverinu í gær.
Komur á starfsmannaheilsugæslu álversins í Reyðarfirði eru orðnar um 3000 það sem af er þessu ári. Þetta kom fram hjá Guðnýju B. Hauksdóttur framkvæmdastjóra öryggis- og heilsu hjá Alcoa Fjarðaáli, á íbúafundi sem haldinn var í álverinu í gær.
Um 30 manns voru á fundinum, þar sem farið var meðal annars yfir stöðuna í heilbrigðismálum, það helsta sem er á döfinni hjá fyrirtækinu, umhverfisvöktun álversins og starfsemi verktaka á álverslóðinni. Það kom vel fram í máli Guðnýjar, hversu mikilvæg starfsemi Heilbrigðisstofnunar Austurlands er fyrir Fjarðaál og að niðurskurður þar muni hafa mikil áhrif á öryggi og búsetuskilyrði starfsfólks og verktaka sem starfa hjá fyrirtækinu.
Tómas Már Sigurðsson forstjóri Fjarðaáls greindi frá því helsta sem er á döfinni, svo sem byggingu 4000 fermetra kersmiðju við álverið, sem mun skapa yfir hundrað störf á framkvæmdatíma og tugi framtíðarstarfa. Hann fjallaði einnig um nýlegt álit Skipulagsstofnunar um álver, raforkuver og flutningslínur á Bakka og sagði að mörgum spurningum væri enn ósvarað varðandi verkefnið svo sem varðandi magn orku á svæðinu og á hvaða verði hún verður.
Geir Sigurpáll Hlöðversson framkvæmdastjóri umhverfis- og skautsmiðju fór yfir umhverfisvöktun álversins og magn útblástursefna frá því, miðað við starfsleyfismörk. Fram kom að það sem af er ári, eru öll efni undir þeim mörkum sem sett eru í starfsleyfi. Hann lýsti því einnig hvernig rafmagnstruflanir geta haft áhrif til að mynda á losun flúorkolefna, sem eykst verulega ef rafmagnið fer af. Allur framleiðsluúrgangur álversins er sendur til útlanda til endurvinnslu og einungis 0,4% af úrganginum frá álverinu fer til urðunar. Stefnan er að enginn úrgangur fari til urðunar.
Fram kom á fundinum að næstum 60% starfsmanna álversins búa í Fjarðabyggð, en rétt rúmlega fjórðungur á Fljótsdalshéraði. Tómas Már greindi frá því að konum í álverinu hefði heldur fækkað frá þeim tíma þegar þær voru flestar og sagði unnið að því að skapa meiri sveigjanleika í störfum til að koma til móts við konurnar. Hugsanlega yrði vaktakerfinu breytt og fleiri störf unnin í dagvinnu.
Magnús Helgason framkvæmdastjóri Launafls lýsti þýðingu álversins fyrir sitt fyrirtæki. Hann sagði ljóst að hefði álverið ekki verið reist, hefði ríkt stöðnun á svæðinu. Hefði Alcoa ekki reist álverið hefði Launafl heldur ekki orðið til, en það varð til við sameiningu nokkurra austfirskra fyrirtækja, sem voru sameinuð til þess að geta þjónustað álverið. Magnús lýsti jákvæðum og neikvæðum þáttum sem hefðu fylgt uppbyggingunni. Það jákvæða væri að það hefðu orðið til yfir 1000 störf á svæðinu, íbúum hefði fjölgað og þjónusta aukist. Það sem væri hins vegar neikvætt, væri að það líkaði ekki öllum að vinna í þessu umhverfi og þætti vinnan einhæf. Þá væri erfitt fyrir aðfluttar konur að finna störf við hæfi. Hann sagði fyrirtækin á svæðinu vera að hefja vinnu við að gera svæðið meira aðlaðandi til búsetu.
Tómas Már greindi frá því að Alcoa Fjarðaál hefði frá því fyrirtækið hóf starfsemi á Íslandi, veitt nær hálfum milljarði króna til samfélagslegra verkefna af ýmsu tagi, hæsti styrkurinn var veittur Vinum Vatnajökuls. Í lok fundarins fór hann yfir helstu atriði í skýrslu Háskólans á Akureyri um áhrif Kárahnjúkavirkjunar og álversins í Reyðarfirði á samfélagið eystra á árunum 2002 – 2009. Samkvæmt skýrslunni fjölgaði fólki á Mið-Austurlandi um 22% á þessu tímabili, en fækkaði á svæðinu fyrir norðan og sunnan það. Nettófjölgun á Austurlandi var um 5%. Þá kemur einnig fram í skýrslunni að 83 milljarðar króna runnu inní íslenska hagkerfið á meðan á framkvæmdunum stóð. Á sama tíma nam fjárfesting atvinnuvega á Íslandi, um 1500 milljörðum og einkaneysla jókst um 40%.
|
|
|
|
|
