 |
|
|
|
|
Prentvæn útgáfa
 go
|
|
3. nóvember 2010
Milljarða fjárfesting og tugir starfa við nýja kersmiðju
Fyrsta skóflustungan að nýrri kersmiðju Alcoa Fjarðaáls við Reyðarfjörð var tekin í dag, en stefnt er að því að hún verði tilbúin í ársbyrjun 2012. Heildarfjárfesting vegna kersmiðjunnar er áætluð um um 3,5 milljarðar króna.
Meðan á framkvæmdatíma stendur munu 60-80 manns að jafnaði vinna við bygginguna en um 160 þegar umsvifin verða í hámarki. Rekstur kersmiðjunnar skapar um sjötíu ný störf til frambúðar. Þetta er til viðbótar þeim 800 störfum sem þegar eru til staðar á álverssvæðinu í Reyðarfirði.
Verkfræðistofan Hatch hefur umsjón með byggingunni fyrir Fjarðaál í samstarfi við verkfræðifyrirtækið HRV. Ýmsir fleiri innlendir aðilar munu koma að verkinu. Samið hefur verið við Tandraberg á Eskifirði um jarðvinnu við kersmiðjuna og verið er að ganga frá samningum við aðra verktaka um næstu áfanga verksins.
Kersmiðjan skiptist í þrjá hluta, þ.e. kerfóðrunarbyggingu, kerbrotabyggingu og skrifstofubyggingu. Flatarmál bygginganna verður samtals rúmlega fjögur þúsund fermetrar. Ál er framleitt í 336 kerum í álveri Fjarðaáls og þau þarf að endurnýja á 5-7 ára fresti. Í nýju kerfóðrunarbyggingunni verður mögulegt að fóðra þrjú ker í einu. Þar verður einnig svæði til að kæla ker, viðgerðaraðstaða og geymslusvæði fyrir ýmsan búnað.
Í kerbrotabyggingunni verða kerin hreinsuð og kerbrotunum komið fyrir í gámum. Þau verða send í endurvinnslu til Bretlands og enda sem hráefni í sement.
|
|
|
|
|
