 |
|
|
|
|
Prentvæn útgáfa
 go
|
|
15. desember 2009
Íslensku álverin í fararbroddi í heiminum
Á loftlagsráðstefnu Sameinuðu þjóðanna, sem nú stendur yfir í Kaupmannahöfn, munu íslensk stjórnvöld ekki óska eftir áframhaldandi undanþágu á Kyoto-bókuninni. Í samtali við Morgunblaðið nýlega sagði umhverfisráðherra að frá 2013, þegar gildistími bókunarinnar rennur út, fari íslenska stóriðjan undir sameiginlegt viðskiptakerfi ESB með losunarheimildir fyrir stóriðju. Sagði ráðherrann að við gildistöku viðskiptakerfisins muni losunarheimildirnar færast frá ríki til fyrirtækja og fái íslensku stóriðjufyrirtækin hlut úr heildarkvóta ESB.
Í viðtalinu sagði ráðherrann að svo virtist sem Evrópukerfið virkaði sem hvati fyrir fyrirtækin til að minnka losun. Samtök atvinnulífsins telja að kerfið verði viðráðanlegt svo fremi sem þess verði gætt að samkeppnisstaða íslenskra fyrirtækja versni ekki. Fyrir stóriðjuna geti það komið ágætlega út þar sem íslensku fyrirtækin standi sig mjög vel miðað við fyrirtæki í Evrópu. Það gefi þeim betri stöðu þar sem þeir bestu muni fá kvótann án þess að greiða fyrir hann.
Sérfræðinganefnd umhverfisráðuneytisins
Staðfesting á góðum árangri íslensku álfyrirtækjanna varðandi minnkum útstreymis kemur m.a. fram í nýlegri skýrslu sérfræðinganefndar umhverfisráðuneytisins um möguleika til að draga úr nettóútstreymi gróðurhúsalofttegunda á Íslandi, sem birt var fyrr á þessu ári. Í henni kemur fram að útstreymi gróðurhúsalofttegunda á hvert framleitt tonn í íslenskum áliðnaði hafi minnkað umtalsvert frá árinu 1990. Sem dæmi er nefnt að á sama tíma og útstreymið hafi aukist um 72 prósent frá 1990 til 2007 hafi framleiðslan aukist um 418 prósent. Meðal annars er tekið dæmi af álverinu í Straumsvík þar sem útstreymi minnkaði um meira en 50 prósent á sama tíma og ársframleiðslan jókst um 100 prósent.
Bein losun Alcoa minnkað um 36%
Sú áhersla sem lögð er á umhverfismál og aukna sjálfbærni hjá Fjarðaáli er í samræmi við stefnu Alcoa um allan heim, þar sem tekist er á við neikvæð umhverfisáhrif og baráttu við loftslagsbreytingar. Sem dæmi má nefna að á tímabilinu frá 1990 til 2008 hefur bein losun gróðurhúsalofttegunda frá álverum Alcoa minnkað um 36 prósent. Þennan góða árangur má m.a. þakka álveri Alcoa við Reyðarfjörð, þar sem Ísland nýtur þeirrar sérstöðu á heimsvísu að um 80 prósent allrar orku sem notuð er í landinu koma frá endurnýjanlegum orkugjöfum. Evrópubúar stefna að því að koma þessu hlutfalli í 20 prósent árið 2020.
Ísland í forystu í loftslagsmálum
Á Íslandi er losun koltvísýrings frá orku- og álframleiðslu átta sinnum minni en frá sambærilegri framleiðslu til dæmis í Kína, þar sem rafmagnið er framleitt með kolum. Af þessum ástæðum m.a. er formaður loftslagsnefndar Sameinuðu þjóðanna, Dr. Rajendra Pachauri, þeirrar skoðunar að mun betra sé fyrir loftslagið í heiminum að framleiða ál á Íslandi en í löndum þar sem orkan er framleidd með jarðeldsneyti. Pachauri hefur hrósað Íslendingum fyrir forystu í baráttunni fyrir minni losun gróðurhúsalofttegunda
|
|
|
|
|
