Alcoa greindi frá því í gær að búið sé að verðleggja opinbert útboð á hlutabréfum í fyrirtækinu og skuldabréfum með breytirétti, en fyrirtækið hefur skráð útboðið í kauphöllinni í New York. Reiknað er með að útboðið muni skila Alcoa u.þ.b. 1,3 milljörðum Bandaríkjadala, sem samsvarar um 147 milljörðum króna.

Fyrirtækið tilkynnti að ákveðið hafi verið að selja 150 milljón almenna hluti með opnu útboði á 5,25 Bandaríkjadali á hlut. 

Fyrr í þessari viku greindi Alcoa frá útgáfu skuldabréfa með breytirétti með höfuðstól upp á 250 milljónir dala. Alcoa hefur ákveðið að auka útgáfuna í 500 milljónir dala og eru vextir bréfana 5,25% með gjalddaga árið 2014.

 Fyrirtækið hyggst nota fjárstreymi af útboðinu til þess að greiða útistandandi skammtímaskuldir. Hugsanlegar eftirstöðvar, þegar skammtímaskuldir hafa verið greiddar, verða notaðar í almennan rekstur.

Credit Suisse Securities (USA) LLC, Morgan Stanley & Co. Incorporated, Barclays Capital Inc. og Citigroup Global Markets Inc. sjá um sölu verðbréfanna.
 
Frekari upplýsingar og lagalega fyrirvara er að finna í tilkynningu Alcoa Inc.