• Dregið verður úr álframleiðslu um 750.000 tonn á ári, sem samsvarar 18% framleiðslunnar
• Starfsmönnum verður fækkað um 13.500 (13 % af heildarmannafla fyrirtækisins) auk þess sem 1.700 verktakastörf verða lögð af
• Laun verða fryst og ráðningum hætt tímabundið
• Fjögur framleiðslufyrirtæki í eigu Alcoa sem starfa utan álframleiðslu verða seld
• Dregið verður úr fjárfestingarkostnaði um 50%
• Nýjar leiðir verða nýttar til hráefnisöflunar
• Skipt á eignarhaldi við Orkla: Alcoa fær 100% eignarhald í tveimur álverum og rafskautaverksmiðju Elkem í Noregi en lætur eftir 45% hlut í sænska fyrirtækinu SAPA

Reiknað er með að gjaldfærður kostnaður á fjórða ársfjórðungi 2008 nemi 900-950 milljónum Bandaríkjadala eftir skatta. Um 80% þess kostnaðar hefur ekki áhrif á handbært fé.
 
Þessar aðgerðir byggja að nokkru leyti á ákvörðunum fyrirtækisins sem kynntar voru í október sl., en þær fela í sér frekari samdrátt í framleiðslu, hagkvæmari innkaup og minni kostnað, hagræðingu í framleiðslu, minni kostnað vegna nýrra fjárfestinga og aðrar sparnaðaraðgerðir.
 
„Þetta eru óvenjulegir tímar sem kalla á hröð og ákveðin viðbrögð til þess að takast á við efnahagskreppuna sem nú ríkir í heiminum, ásamt sveigjanleika og framsýni til þess að vera viðbúin óvissu á álmarkaðinum,“ segir Klaus Kleinfeld, forstjóri og stjórnarformaður Alcoa Inc. „Við erum að grípa til stórtækra og skynsamlegra aðgerða til þess að tryggja að Alcoa haldi forystu á kröfuhörðum markaði og ætlum okkur að koma enn sterkari út þegar efnahagslífið verður búið að ná sér.“
 
Tómas Már Sigurðsson, forstjóri Alcoa á Íslandi, segir þessar aðgerðir ekki hafa bein áhrif á Fjarðaál. „Við erum búin að ráða í öll störf og höfum verið að auka framleiðsluna í kerskálunum hjá okkur og á því verður engin breyting. Við þurfum hins vegar að bregðast við erfiðleikum á mörkuðum með hagræðingu og ráðdeild í rekstri og til þess eru mörg tækifæri,” segir Tómas.