Framkvæmdir við Fljótsdalslínur hafnar
Starfsmenn Ístaks hf. byrja núna í vikunni að leggja slóða vegna væntanlegra háspennulína úr Fljótsdal til álvers Fjarðaáls við Reyðarfjörð. Fjarðabyggð hefur gefið út tilskilið framkvæmdaleyfi Landsvirkjun til handa og fyrst verður lagður vegslóði vegna línuleiðar frá Hrauni (þar sem álverið á að rísa) að Seljateigi við Reyðarfjörð.   Sjá nánar hér á fréttasíðu Kárahnjúkavirkjunar.
25. ágúst 2004

Nýr upplýsingavefur um umhverfismál
Vefur Umhverfisstofnunar Evrópu er nú til á öllum tungumálum aðildarlanda stofnunarinnar. Ísland er aðili að stofnuninni, en hlutverk hennar er að veita áreiðanlegar upplýsingar um umhverfismál í Evrópu. Stofnunin þjónar bæði almenningi og öllum þeim aðilum er vinna að því að móta og framfylgja umhverfisstefnu innan Evrópusambandsins og í einstökum löndum álfunnar. Þessar upplýsingar hjálpa ríkjum Evrópu að taka upplýstar ákvarðanir um hvernig hægt er að hlúa að umhverfinu, koma að umhverfissjónarmiðum við stefnumótun í efnahagsmálum og stefna að sjálfbærri þróun. Á vef Umhverfisstofnunar Evrópu er meðal annars að finna útdrætti úr helstu skýrslum, stutt yfirlit um ástand umhverfismála, tilkynningar til fjölmiðla og upplýsingar um ýmis málefni stofnunarinnar. Íslenska vefinn er að finna hér.
5. ágúst 2004 (Fréttatilkynning frá umhverfisráðuneyti)

Heimasíðan opnuð
Heimasíða samráðshópsins verður formlega opnuð þann 1. september nk. á öðrum fundi hópsins. Við vonum að þessi síða verði öllum til gagns og hjálpi bæði okkur og öðrum að fylgjast með því sem er að gerast á sviði sjálfbærrar þróunar.
28. júní 2004

Næsti fundur
Annar fundur samráðshópsins verður haldinn á Reyðarfirði þriðjudaginn 31. ágúst og miðvikudaginn 1. september. Lesið meira um fundinn hérna.
29. júní 2004

Hugi Ólafsson í nýju starfi
Daginn sem Hugi Ólafsson hjá Umhverfisráðuneytinu sat á fyrsta fundinum okkar (7. júní) tók hann við stöðu skrifstofustjóra í ráðuneytinu. Fréttatilkynning frá Umhverfisráðuneytinu þann dag segir: „Hugi Ólafsson hefur starfað í umhverfisráðuneytinu frá 1995, fyrst sem deildarstjóri upplýsingadeildar og síðan sem deildarstjóri stefnumótunardeildar. Hann starfaði sem blaðamaður á Morgunblaðinu 1987-1989 og 1994-1995 og hjá upplýsingadeild Sameinuðu þjóðanna í New York 1991-1994. Hugi er með BA-gráðu í jarðfræði og stjórnmálafræði frá Occidental College í Los Angeles og Masters-gráðu í alþjóðastjórnmálum frá Columbia-háskóla í New York. Maki Huga er Jóhanna Magnúsdóttir stjórnmálafræðingur og eiga þau tvo syni.“ Til hamingju með nýja starfið, Hugi!
10. júní 2004