Bauxitip aluminiussanngorlugu akuiarneqartarnera
BSaffiugassiassaq Bauxite aluminiuliornermi toqqaannartumik atorneqarneq ajorpoq. Siullermik aluminium oxidinngorlugu, imaluunniit aluminiussanngorlugu, akuiarneqartariaqarpoq. Alcoa nunarsuarmi aluminiussaliortartut annersaraat, tassa nunarsuarmi tamarmi ukiumut 14 million tonsinik akuiaasinnaassuseqarluni, nunarsuarmi akigineqartartut pingajorarterutingajaannik. Akuiaaviuteqarpugut Australiami, Brasiliami, Jamaicami, Spaniami, Surinamimi aammalu USA-mi. Australiap kitaani akuiaavigut pingasuijusut nunarsuarmi aluminiussamik pissarsiviusartut annersaraat nunarsuarmi nioqqutigineqartut 15%-iinik sanaartorsinnaassuseqarami.
 
Aluminiussaq qaqortuulluni aseqquluttuuvoq, tarajuaqqaniit aseqqorinnerulaarluni, ativialu tassaavoq aluminium oxid. Bayerip akuiaariaasia nunarsuarmi tamarmi atorneqartoq sisamanik immikkoortortaqarpoq - agguineq, immikkoortiterineq, kitsitsineq aammalu akuiaaneq. Bauxite aluminiussanngortinniaraangatsigu saffiugassiassaq aserortertarparput ukkusissamik sodamillu akullugu, naqitsinilerujussuarmut ikisarlugit, kissattarlugillu. Aluminium oxid sodamit arrortinneqartarpoq, tassanngalu kittarluni, errorneqarluni, imerlu peerniarlugu kissanneqartarluni. Sinneruttoq tassaasarpoq qajuusaasat aluminiussaq aluminamik taaneqartartut, taannalu aatsiterivikkut saffiugassanngorluni aluminiunngortarluni.
 
Alcoami akuiaariaaseq nunarsuarmi malinneqartarpoq
1992-imi Australiap kitaani akuiaavimmi Kwinanami Alcoa World Aluminamit and Chemicalsimillu (Alcoa-p WMC-illu 60/40-imik piginneqatigiiffigisaat) nunarsuarmi siullersaalluni ISO 9002 naapertorlugu pitsaassutsimut piumasaqaatinik naammassinnilluni akuersissutisivoq. Australiami akuiaaviutivut allat marluk, Pinjarra aamma Wagerup, Australiap kitaani Alcoap bauxitemik piiaavii peqatigalugit, 1994-imi piumasaqaatinik taakkuninnga naammassinnipput. Taamattaaq Kwinanami akuiaavik siuttooqqilluni 1997-imi ISO 14001 naapertorlugu avatangiisinik aqutsinermut akuersissummik pissarsivoq. Alumar, São Luís, Brazil akuiaaviutigaluni aatsiteriviusoq, 2000-imi akuersissutinik taakkuninnga marlunnik tamanik pissarsivoq. Amerikami Kujallermi taama ittunik suliaqarfiit annersaalluni Alumar Alcoa Aluminio S.A.-mit piginneqataaffigineqarpoq, tassa aluminiumik tunisassiortoq arlariinnik sulialik Alcoap 59,1%-imik piginneqataaffigisaa.
 
Alcoap Akuiaasinnaassusia (Tuluttut)
 
Standalone Bauxite Mine Interests (Tuluttut)
 

Wagerup

Assi toorlugu allisiguk.


Alcoa Wagerupimi akuiaavia, Australiap kitaani.